ENO MINZAANI: Ttiimu eyagenze e Congo n'eye Kenya eriwa esinze okufunamu? Aba Muhangi bakomyewo balaga midaali, aba Rukundo baleese obukadde 112 n'emidaali!
ENO MINZAANI: Ttiimu eyagenze e Congo n'eye Kenya eriwa esinze okufunamu?
* Aba Moses Muhangi bakomyewo na midaali, aba Rukundo baleese obukadde 112!
BYA JUMA ALI
EMPAKA z'ebikonde eza African Boxing Elite men and women championship zaategekeddwa ebibiina bibiri mu mwezi gwegumu.Zona zaategekeddwa mu mwezi gwa October wabula mu bifo eby'enjawulo.
Ekibina ekya World Boxing ,kyo kyategekedde mu ggwanga lya Kenya ate ekya AIBA ,kyo kyategekedde mu ggwanga lya Democratic Republic of Congo (Zaire).
Ttiimu eyagenda e Kenya,yalina abakubi 17 era nga baafunye emidaali gya zzaabu 4, ffeeza 1 n'ekikomo 8 era ekulemberwa Moses Muhangi.
Ate ttiimu eyagenda e Kinshasha, yalina abakubi 9 nga bafunye omudaali gwa ffeeza 1 n'ebikomo 3 ate 3 baakubwa ku kwota fayinolo era eno ye ttiimu ya UBF Interim ekulemberwa Samuel Rukundo.
ANI ASINZE OKUFUNAMU?
Ttiimu eyagenda e Kenya,okuggyako okuwangula emidaali tabalina kirala kyebafunyemu wabula ate ttiimu eyagenda e Kinshasha, bawangudde 25,000 eza ddola (eza Uganda 112,500,000).
Kinajjukirwa nti mu mpaka ezibadde e Congo, buli awangula omudaali gwa zaabu afuna 15,000 eza ddola (eza Uganda 67,5000,000), ffeeza afuna 10,000 eza ddoola (eza Uganda 45,000,000) ate ekikomo afuna 5,000 eza ddoola (eza Uganda 22,500,000).
EBONG ATUNUULIDDE KUVUGA KAPYATA
Omukubi w'ebikonde yekka eyawangudde omudaali gwa ffeeza mu mpaka ezibade e Congo, Ebong Emmy yeesunga okuvuga kapyata oluvanyuma lw'okuwangula omudaali gwa ffeeza nafunirako 10,000 gwa ddola (eza Uganda 45,000,000).
SARAH ALINDIDDWA NG'OMUZIRA E GULU
Mwanamuwala Sarah Laker azanya mu buzito bwa light weight oluvanyuma lw'okuwangula omudaali gw'ekikomo n'afunirako ne 5,000 eza ddoola (eza Uganda 22,500,000) mu mpaka ezaabadde e Kinshasha kati abatuuze b'e Gulu gyava bategese okumwaniriza ng'omuzira.
Comments
Post a Comment